სულ რამდენიმე თვეში საქართველო  დამოუკიდებლობის აღდგენის 100 წლისთავს აღნიშნავს . 1918 წლიდან გავიდა 100 წელი, და ამ ხნის მანძილზე  ქართველ ერს მხნეობა არ დაუკარგავს,   უარი არ უთქვამს თავისუფლებაზე,   არ შეუწყვეტია ბრძოლა დამოუკიდებლობისათვის.  

სახელმწიფოს ჰქმნის მაღალგანვითარებული საზოგადოება, რომლისთვისაც განათლება პრიორიტეტულია; ამიტომ ცხადია შემთხვევითი არ არის, რომ  კავკასიის პირველი უნივერსიტეტის, ჯავახიშვილის სახელმწიფო უნივერსიტეტის შექმნის თარიღი ემთხვევა  მე-20 ს-ის დასაწყისის საქართველოს სახელმწიფოს აღორძინებას, პირველი რესპუბლიკის  შექმნას. ეხლა უკვე ჩვენთვისაც ცნობილია, რომ 1921 წლის თებერვალში, როცა საქართველოს დემოკრატიულ რესპუბლიკას საბჭოთა რუსეთის ჯარები შემოესია, ქვეყნის დამოუკიდებლობის გადასარჩენად თსუ-ის პროფესორ-მასწავლებლებმა რექტორის - ი. ჯავახიშვილის მეთაურობით მტკიცე სოლიდარობა გამოუცხადეს რესპუბლიკის ხელისუფლებას და სამშობლოს დამცველთა რიგებში ჩადგომა გადაწყვიტეს. თუმცა, სულ მალე საქართელოდან დევნილი ხელისუფლება, მთელი პოლიტიკური ელიტა იძულებული გახდა ქვეყანა დაეტოვებინა და საფრანგეთისთვის ეთხოვა თავშესაფარი.

აღსანიშნავია, რომ მთელი ამ წლების მანძილზე საფრანგეთში, ემიგრაციაში მყოფმა ჩვენმა  წინაპრებმა შეძლეს ქართული ტრადიციების და დამოუკიდებელი, დემოკრატიული საქართველოს სიმბოლოების შენარჩუნება; ამიტომაცაა, რომ წელს  ერთმანეთის მიყოლებით ვზეიმობთ ჩვენი ქვეყნისათვის ამ ორ უმნიშვნელოვანეს საიუბილეო თარიღს.

საფრანგეთში მცხოვრებ ქართველთა სათვისტომო ასრულებს რა მამების ნაანდერძალს,   ცდილობს თავისი თუნდაც მცირედი წვლილი შეიტანოს ქართველი ახალგაზრდების აღზრდის საქმეში. სწორედ ამიტომ 10 წლის წინ ჩვენს სათვისტომოსა და უნივერსიტეტს შორის დამყარებული მეგობრული ურთიერთობა და თანამშრომლობა, მემორანდუმის სახით გავაფორმეთ. ამ წლების მანძილზე მემორანდუმის ფარგლებში არაერთი საინტერესო პროექტი განხორციელდა.

საფრანგეთში მცხოვრებ ქართველთა სათვისტომო პატივს მიაგებს რა უნივერსიტეტს და მის ისტორიას, მიესალმება უნივერსიტეტის ხელმძღვანელებს, კერძოდ მის რექტორს  პროფ. გიორგი შერვაშიძეს, ვიცე-რექტორს პროფ. ალექსანდრე ცისკარიძეს, ისევე, როგორც უნივერსიტეტის პროფესორებს და ადმინისტრაციას.

სათვისტომო მიესალმება აგრეთვე,  ცოდნის შეძენის და საკუთარი სულიერი სამყაროს გამდიდრების სურვილით შეპყრობილ უნივერსიტეტის სტუდენტობას.

უნივერსიტეტის სიძლიერე, ხედვა, გამბედაობა, იქნება გარანტი იმისა, რომ უახლოეს მომავალში სწორედ სტუდენტთა თაობა გახდება ჩვენი ერის ინტელექტუალური ელიტა.

პატივისცემით,

Cliquez sur le logo 
pour vous rendre sur
le site Samchoblo

(géré par Othar Pataridzé)